ወሎ ዩኒቨርሲቲ በከሚሴ ከተማ ቅርንጫፍ ለመክፈት ቦታ ተረከበ።
  March 23, 2020    News

የወሎ ዩኒቨርሲቲ ተደራሽነቱን በማስፋፋት የግቢ (የካምፓስ) ብዛቱን ሶስት ለማድረስ ከከሚሴ ከተማ አስተዳደር 100 ሄክታር መሬት ተርክቧል። በዚህም የቦታ ርክክብ የዩኒቨርሲቲውን ፕሬዚዳንት ጨምሮ ም/ፕሬዚዳንቶች፣ የኮሌጅ ዲኖችና ዳይሬክተሮች ተገኝተዋል። የዩኒቨርሲቲው አመራሮች የከሚሴ ከተማ አስተዳደር በስጦታ ያበረከተውን ቦታ ከጎበኙ በኋላ ከከተማ አስተዳደሩ አመራሮች ጋር ተወያይተዋል። በዚህም ውይይት የወሎ ዩኒቨርሲቲ ፕሬዚዳንት ዶ/ር አባተ ጌታሁን በከሚሴ በቀጣይ የሚከፈተው ኮሌጅ የከሚሴንና የአካባቢውን ማህበረሰብ ጥቅም፣ ፍላጎትና ሃብት መሰረት ያደረገ እንዲሆን በጥናት ላይ ተሞርኩዞ ውሳኔ እንደሚሰጥበት ተናግረዋል። ፕሬዚዳንቱም የከሚሴ ከተማ አስተዳደር ላደረገው የቦታ ስጦታ ላቅ ያለ ምስጋና ካቀረቡ በኋላ ም/ፕሬዚዳንቶች በየዘርፋቸው ቦታውን ተረክቦ የከሚሴንና የአካባቢውን ማህበረሰብ ጥያቄዎች ለመመለስ በሎም የተሰማቸውን አስተያየት እንዲሰጡ አድርገዋል። ወሎ ዩኒቨርሲቲ በርካታ በሆኑ የቅድመና ድኅረ ምረቃ ፕሮግራም ስልጠናዎችን እየሰጠ እንደሆነ የገለጹት የአካዳሚክ ጉዳዮች ም/ ፕሬዚዳንት ተወካይ ዶ/ር ብረሃን አስማሜ የአካባቢውን ማህበረሰብ የትምህርት ፍላጎት መሰረት ያደረጉ ኮሌጆችን፥ ት/ክፍሎችንና ፕሮግራሞችን ለመክፈት እንደሚሰሩ ቃል ገብተዋል። በምስራቅ አማራ ጨፋ ሸለቆ ያለው ከፍተኛ የሃብት ክምችት ከአካባቢው ማህበረሰብ ተርፎ ለገበያ እንዲውል የምርምር ማዕከል በቦታው በመክፈት ህዝባችንን ከድህነት የሚያወጡ የምርምር ስራዎችን በማካሄድ እድሉን ለመጠቀም እንደሚሰሩ የተናገሩት የዩኒቨርሲቲው የምርምርና ማህ/አገ/ ም/ፕሬዚዳንት ዶ/ር ፋሪስ ኃይሉ ናቸው። የቦታው ህጋዊ ሰነዶች በሙሉ በዩኒቨርሲቲው ስም ሆነው እንደተጠናቀቁ ተገቢውን የግንባታና ተቋሙን የማደራጀት ተግባራት እንደሚጀምሩ የገለጹት የዩኒቨርሲቲ የአስተዳደርና ተማ/አገልግሎት ም/ፕሬዚዳንት ዶ/ር አማረ ምትኩ ዩኒቨርሲቲው ተደራሽነቱን በማስፋት የማህበረሰቡን ጥያቄዎች ለመመለስ የአቅሙን ሁሉ ይሰራል ሲሉ አስተያየታቸውን ሰጥተዋል። በከሚሴና አካባቢ ያለውን ስራ አጥነት ለመቅረፍ ከክህሎት ስልጠና ጀምሮ በአዋጭ የስራ መስኮች ወጣቱ እንድሰማራ በማድረግ ኃላፊነታቸውን ለመወጣት የቢዝነስ ልማትና አለም አቀፍ ግንኙነት ም/ፕሬዚዳንቷ ዶ/ር አጸደ ተፈራ ሲገልጹ የኮምቦልቻ ቴክኖሎጅ ኢንስቲትዩት ሳይንቲፊክ ዳይሬክተር ዶ/ር መላኩ ታመነ በበኩላቸው የአካባቢውን ማህበረሰብ ፍላጎት በማየት በኮምፒተር ሳይንስ ፕሮግራሙችን መክፈት እንደሚችሉ ተናግረዋል። የኮሌጅ ዲኖችና ዳይሬክተሮች በጉብኝቱ ያዩትን፣ የተሰማቸውንና በቀጣይ በቦታው ቢሰራ ያሏቸውን አስተያየቶች ሰጥተዋል። ዩኒቨርሲቲው ከዚህ በፊት ከከተማ አስተዳደሩ ለወጣቶች የስነተዋልዶ፣ የመዝናኛ፣ የቤተ መጻሕፍትና ተዛማጅ የማህበረሰብ አገልግሎቶችን የሚሰጥበት ማእከል ተቀብሎ ወደ ስራ መግባቱ የሚታወቅ ነው።